خردوات مولانا

=========

🎭 كله بـ2.5 وتعالى بص

✍️ بقلم: محسن عباس

🪞مدخل:

في زمنٍ صار فيه كل شيء سلعة —
حتى الكلمة، والضمير، والوطن —
يُفتح سوقٌ ضخمٌ للزيف،
تُباع فيه القيم على الأرصفة،
ويُنادى على الحقيقة في المزاد العلني.
مرحبا بكم في معرض "كله بـ2.5 وتعالى بص"…
الذي فيه كل شيء — إلا الإنسان.

🎪 المعرض الكبير:

أمشاط وفلايات وشرايط ملوّنة،
مكياج وكريمات ومانيكير ألوانات،
وعروسة "باربي" بأحدث الموضات.
عندنا كتب قصّ ولزق عن أي حاجة…
مش مهم تفهم، المهم تنشر وتكسب.

عندنا "لوجوهات" لأحزاب،
صحيح مفيش أحزاب،
بس اليافطة أهم من الحزب.
عندنا خطب عصماء عن حقوق الإنسان،
صحيح مفيش إنسان،
بس الخُطب موجودة!

عندنا مشاعر إنسانية بايرة،
عليها أكازيون: خد عشرة وعليهم لعبة فطار هدية برضه!
وعندنا أغانٍ قديمة وحديثة ووطنية كمان،
خد اللي يعجبك، وكله بـ2.5 وتعالى بص.

🧾 صور وخطب وهدايا:

مجّانًا للأبد:
صور نخبة الممثلين والممثلات،
الصحفيين، الكتّاب، أساتذة الجامعات،
الشعراء، النقّاد — مع إن مفيش إبداع عشان يتنقد.
وعلى كل صورة، هدية النشيد الوطني:
بلادي بلادي لكِ حبّي وفؤادي.
وكله بـ2.5 وتعالى بص.

عندنا جرائد قديمة وحديثة،
فيها مقالات "كبير الكهنة" وتحتها مقالات أولاده وأحفاده،
كلهم تحت عنوان مبهر: (بصراحة!)
وهدايا كتير…
وكله بـ2.5 وتعالى بص.

🕌 الدين تحت الطلب:

عندنا شرائط وسيديهات دينية
لكل المشايخ المشهورين،
تعلمك الصلاة والزكاة والتكافل…
بس عن العدل والحرية؟ لا.
والفتاوى ديليڤري — على الهوا أو حسب المزاج.
كله بـ2.5 وتعالى بص.

🎧 فن الغيبوبة الجماعية:

عندنا أغانٍ مفيش فيها وجدان ولا إبداع،
أي تخبيط وخلاص،
من عمرو دياب لتامر حسني لحد أوكا وأورتيجا.
كله بـ2.5 وتعالى بص.

بفكّر أفتح جنب دكان الخردوات فاترينة أكل:
سندوتشات لحم بشري مشوي.
كل واشخر.

⚰️ ما لا يُشترى:

عندنا 74 فانلة لأولاد زي الفل،
بس أصحابهم ماتوا غدر.
مش للبيع،
حتى لو بكل كنوز الدنيا.

🎬 دراما على المقاس:

عندنا أفلام تعلمك إزاي تخون مراتك،
وإزاي تشرب مخدرات،
وإزاي تبقى نجم،
بس الفن رسالة — أو كده بيقولوا.
كله بـ2.5 وتعالى بص.

عندنا روايات عن الجنس والكفر،
بس ولا كلمة عن سياسة أو إبداع.
كله بـ2.5 وتعالى بص.

📺 برامج... للتنويم فقط:

عندنا برامج تعجن في أي نيلة،
أهم حاجة "التضليل"...
وده من مولانا، ببلاش.
خلي الناس تتنيل، وبلاش تبص.

📚 التاريخ بالقطعة:

عندنا كتب تاريخ مزوّر
بس على "مية بيضا"، قديمة وحديثة،
كل الألوان متوفّرة.
كله بـ2.5 وتعالى بص.

⚽ الرياضة آخر اهتمام:

وعندنا برامج رياضية
تشجّع على كل حاجة إلا الرياضة،
بيقدّمها جهلة ومنافقين وولاد تييييييت...
اللي يلحق قبل ما يعقلوا!
كله بـ2.5 وتعالى بص.

🧠 الخاتمة:

في هذا السوق المفتوح على الخراب،
الوعي سلعة نادرة،
والصمت أرخص من الكلام.
كل شيء يُباع… إلا الحقيقة،
فهي ممنوعة التداول.

كله بـ2.5 وتعالى بص.

مولانا